Un struc di Udin

Directo desde Udine nos llega el análisis sobre la última temporada del Udinese a cargo del amigo Christian Romanini, un verdadero lujo... Grazie Christian!
Diretto da Udine arriva l' analisi dell' Udinese nell' ultima stagione, grazie al nostro caro amico, Christian Romanini, veramente un lusso, Grazie Christian!

Un resumen del Udinese

La stagjon 2008/2009 dal Udin dal sigûr no restarà segnade tai libris dai trofeus: di fat no vin concuistât nissune cope o titul. Ma tal stes timp no mi sint di definî cheste une brute stagjon, anzit: campionât, cope Italie e cope Uefa a son competizions che nol è facil puartâ indevant in contemporanie. E l'Udin lu à fat, restant adiriture la scuadre dal campionât talian che par ultime e je stade eliminade des copie europeanis, cuant che chês altris a jerin za stadis eliminadis.

Par descrivi chest an mi limiti a fâ un paragon cu la ultime partide in cjase che tal gno cjâf e pues jessi une buine metafore di dut il campionât. Cuintri dal Cagliari, l'Udin al è partît benon e za prime de metât dal prin timp o jerin in vantaç di 3 gôi a 0. Come la prime metât dal Campionât che nus veve viodût protagoniscj cuntune partence fulminante, ancje cheste partide si jere inviade te miôr maniere.

Però a un ciert pont il black out, sedi cuintri dal Cagliari, sedi in campionât, a mieze strade e je “saltade la curint”: cussì tai prins minûts dal secont timp o vin cjapât 2 papinis: une partide che e someave di rive jù, intun moment e je deventade scure...

Ma par furtune e je stade dome une sbrissade e la reazion e je rivade daurman (in campionât, invezit, o vin scugnût spietât diviersis setemanis...) e a la fin dai 90 minûts i nestris zuiadôrs a jerin sot de curve a fâ fieste cuntun biel 6 a 2 e tant spetacul fat viodi in cjamp.

La stagjon tal complès e je stade propit cussì: une biele ilusion sul imprin (cualchidun za al fevelave di scudet), scûr neri cuant che a mieze strade i risultâts no rivavin plui e un finâl di campionât che nus à fat tornâ tra lis societât che a àn zuiât miôr.

L'Udin al conferme di no jessi une piçule scuadre, anzit, al à dimostrât di savê regalâ emozions e biel zûc a la tifoseria blancje e nere, ancje se no pues contâ sui belançs stratosferics di ciertis altris societât dal campionât talian. Ma la clime che si respire lant a viodi la partide, cui tifôs che ogni domenie a dimostrin che al pues esisti ancje un “balon par fameis” li che dut al devente fieste, a son robis che nancje il plui siôr di chei altris presidents al pues insumiâsi di comprâ.

Grazie Udin!

Christian Romanini

Vicediretôr dal mensîl "La Patrie dal Friûl"

http://www.lapatriedalfriul.org/